Here Comes the Sun

George HarrisonLagið Here Comes the Sun léttir lundina og vekur von um að framundan sé betri tíð með blóm í haga. Laglínan er einföld og grípandi en takturinn í er sérstakur. Erindin og viðlagið eru í 4/4 takti en í millikaflanum stekkur takturinn yfir í 2/4, síðan í 3/8 og 5/8 og aftur yfir í 4/4. Hljómarnir eru D dúr hljómar en Harrison spilaði þá með klemmu á sjöunda bandi. Þar hljómar lagið í A dúr.

Jákvæðni og bjartsýni einkenna þessa tónsmíð Harrisons en það er nú varla í takt við ástandið á hljómsveitinni á þeim tíma þegar lagið var samið. Eftir lát Brians Ebsteins þurftu þeir að sinna viðskiptahliðinni sjálfir og það átti sennilega ekki vel við þá. George í öllu falli hundleiddist viðskiptafundirnir sem því fylgdu. Ekki hjálpaði upp á andrúmsloftið að John og Paul stóðu í argaþrasi um hvern skyldi fá til að leysa úr peningamálunum. Sjálfur sagði George svo frá að hann hafi í eitt sinn látið sig vanta á einn af þessum leiðindafundum. Í staðinn heimsótti hann vin sinn, Eric Clapton sem þá átti heima í Surrey á Englandi á þessum tíma. Í bakgarðinum hjá Clapton samdi hann lagið á einn af gíturum Claptons. Georg sagði að kveikjan að laginu hafi verið léttir yfir því að vera þarna úti í sólinni en ekki á fundinum. Sjálfum þykir mér nú líklegra að sólinn hafi verið kveikjan. Við vitum öll hve lundin léttist við það eitt að sjá vorsólina brjótast fram eftir langan og dimman vetur.

NóturnarSmelltu á myndina til að fá nóturnar.Þegar Bítlaæðið stóð sem hæst á árunum 1961 – 1967 var samvinna fjórmenninganna með ágætum. Einn þeirra kom með hugmynd að lagi og hinir betrumbættu hugmyndina með gagnrýni sinni, athugasemdum og tillögum. Eftir árið 1967 fór þetta að breytast. Here Comes the Sun var tekið upp fyrir plötuna Abbey Road í Abbey Road hljóðverinu í júlí og ágúst árið 1969. John kom hvergi nálægt upptökunum því hann var annað hvort að jafna sig eftir bílslys eða bara með þvergirðing því á þessum tíma var hann ekki viljugur til að spila í lögum Georges. Paul og Ringo ásamt George tóku bassa, trommur og ryþmagítarinn upp þann 7. júlí og þann áttunda hjálpaði Paul til við sönginn. Síðan sá George um restina.

Ég lærði að spila lagið Here Comes the Sun fyrir mörgum árum síðan og fæ af einhverjum ástæðum aldrei leið á því. Ég spila lagið í plokkaðri útsetningu en George spilaði það með gítarnögl. Í báðum tilvikum er laglínan spiluð með allan tímann. Ef einhver vill glíma við að spila lagið með gítarnögl þá eru textinn og hljómarnir hér. Hér fyrir neðan er upptaka af mér að spila Here Comes the Sun. Hér er ég með klemmu á sjöunda bandi en stundum spila ég það bara í D dúr.