Þingvallavatn 19. júní 2017

Vatnsvíkin freistaði okkar í þetta sinn enda höfðum við heyrt um að þar væru ágætis veiðistaðir. Af einhverjum ástæðum hafði hvorugur okkar veitt í víkinni þrátt fyrir margar ferðir í vatnið. Það fór samt svo að Vatnsvíkin bíður okkar enn um sinn því við guggnuðum á veiði þar. Báðir vorum við með léttan búnað og sauðaustanáttin sem var mun sterkari á Þingvöllum en í bænum fældi okkur frá. Þess í stað gengum við niður að vatninu miðja vegu á milli Hlíðarkróks og Arnarfellsins.

Thingvellir 2017 2Fyrstu flugurnar settust á vatnið um sjöleitið. Krókurinn varð fyrir valinu hjá félaga mínum enn ég valdi pheasant tail. Ég sá að veiðifélaginn var að fiska á grynnra vatni en ég því hann festi ítrekað í botni. Eftir nokkur köst var það samt ekki botninn sem reif í stöngina hjá honum heldur myndarleg kuðungableikja. Hann náði að landa henni og síðan þremur bleikjum til viðbótar. Á meðan skipti ég um flugur í gríð og erg og tapaði þeim nokkrum í grýttum botninum. Náði einungis að setja í eitt stykki murtu en svona er þetta stundum.

Þegar við héldum heim hálftíma fyrir miðnætti var þvílík rjómablíða skollin á og tíu stiga hiti.

Þingvallavatn í júní 2017 from Keli on Vimeo.